Facebook   Twitter
 
«Սուպեր մամա-2»-ի գողության հետքերով

«Սուպեր մամա-2»-ի գողության հետքերով

13 Հունվարի 2018 - 21:28
Վերջին օրերին «Սուպեր մամա-2» ֆիլմը հայտնվեց համացանցում։ Կարճ ժամանակ անց Հայկ Մարությանը՝ Կարգին Հայկոն իր ֆեյսբուքյան էջում գրառում կատարեց՝ նշելով՝ ֆիլմն անօրինական ճանապարհով է հայտնվել համացանցում։
«Հունվարի 3-ից պայքարում ենք մեր ֆիլմի գողացված եւ համացանց ներբեռնված ֆայլի անօրինական տարածման դեմ։ ․․․․ Տեսանյութը ներբեռնող «հերոսներին» ուզում եմ տեղեկացնել, որ ինչպես և բոլոր մեր ֆիլմերը, այնպես էլ այս մեկը մենք ի վերջո անպայման ցուցադրելու ենք թե հեռուստատեսությամբ, թե KarginTV YouTube-յան մեր ալիքով, որպեսզի այն մարդիկ ովքեր հնարավորություն չունեն այցելելու կինոթատրոններ, նույնպես դիտեն ֆիլմը:

Ուղղակի, քանի որ ֆիլմի միակ եկամուտը գալիս է կինոթատրոններից, այն պետք է ցուցադրվի այնտեղ այնքան ժամանակ, որպեսզի առնվազն հետ բերի իր վրա ծախսված գումարները: Այլապես Հայաստանում ֆիլմարտադրությունը ի սպառ կվերանա, ասեմ ավելին` այսօր ֆիլմարտադրությունն արդեն վերացման եզրին է»,- իր ֆեյսբուքյան էջում գրել էր Հայկ Մարությանը։

Այստեղ, փաստացի, հեղինակային իրավունքի խախտում է եղել, իսկ նման երևույթները մեզանում քիչ չեն։ Հեղինակային իրավունքը խախտողները պետք է հստակ գիտակցեն՝ դա օրենքի խախտում է, հետևաբար իրենք կարող են հայտնվել դատարանում և պատասխանատվություն կրել օրենքի առաջ։

Անդրադառնալով վերոնշյալ թեմային՝ «Հայաստանի սպառողների ասոցիացիա» ՀԿ իրավաբան Սյուզաննա Չիլինգարյանը HayNews.am-ի թղթակցի հետ զրույցում նշեց․ «Համացանցը օրեցօր ավելի հասանելի է դառնում աշխարհի տարբեր ծայրերում: Դրան զուգահեռ՝ մեծանում է նաև սոցիալական ցանցերի օգտատերերի թիվը, ովքեր ամեն օր հսկայական ծավալների հասնող նյութեր են տեղադրում իրենց վիրտուալ հարթակներում:

Այս նյութերը պաշտպանվում են հեղինակային իրավունքի մասին օրենքներով, բայց քիչ չեն դեպքերը, երբ վեճեր են առաջանում, թե ում է իրականում պատկանում նյութը, ով է դրա հեղինակը: Այս հարաբերությունները, իրավունքներն ու պարտականությունները իրենց ամբողջ ծավալով չեն ենթարկվում օրենսդրական կարգավորման, հետևապես սոցիալական ցանցերում այս գործընթացի վերահսկումը դառնում է անհամեմատ ավելի բարդ:

Հեղինակային իրավունքի կամ հարակից իրավունքների իրավատերն իր իրավունքները պաշտպանելու նպատակով կարող է Հայաստանի Հանրապետության օրենսդրությամբ սահմանված կարգով դիմել դատարան»:

Իրավաբանի խոսքով՝ ըստ «Հեղինակային իրավունքի կամ հարակից իրավունքների» մասին օրենքի՝ իրավատերն իր իրավունքները պաշտպանելու նպատակով, դատական կարգով, տուժողն իր իրավունքները խախտողից կարող է պահանջել՝

ա) իր իրավունքների ճանաչում
բ) մինչև իրավախախտումը գոյություն ունեցող դրության վերականգնում և իրավունքը խախտող կամ խախտման վտանգ պարունակող գործողությունների կասեցում
գ) նմանակված օրինակների, դրանց պատրաստման համար օգտագործվող նյութերի ու սարքավորումների բռնագրավում կամ ոչնչացում
դ) վնասի հատուցում (ներառյալ՝ բաց թողնված օգուտը)`օրենքով սահմանված կարգով: Օրենքի 22.1-ին հոդվածի խախտման դեպքում վնասի հատուցումը կազմում է 1-2 մլն դրամ
ե) հոնորարի կամ վարձատրության կրկնակի չափով փոխհատուցում, որը իրավատերը կստանար, եթե իրավախախտողը թույլտվություն ունենար հեղինակային իրավունքի օբյեկտի օգտագործման համար, կամ փաստացի խախտման վնասին համարժեք վնասների հատուցում, ներառյալ՝ բաց թողնված օգուտը
զ) դատական վճռի հրապարակումը Հայաստանի Հանրապետությունում գործող զանգվածային լրատվության միջոցներով՝ դատարանի կողմից նախատեսված չափով և մասով, իրավախախտողի միջոցների հաշվին
է) իր իրավունքների պաշտպանության հետ կապված՝ Հայաստանի Հանրապետության օրենսդրությամբ սահմանված այլ միջոցների կիրառում:

Իրավաբան Սյուզաննա Չիլինգարյանը հիշեցրեց՝ ուրիշի ստեղծագործությունից մտքեր, հատվածներ քաղելը առանց դրանց ստեղծագործական վերամշակման և առանց ձեռքբերման սկզբնաղբյուրի նշման և որպես իրենը ներկայացնելը կամ ստեղծագործությունն ամբողջությամբ իր անունով ներկայացնելը համարվում է գրագողություն։

«Բնականաբար, այս պարագայում ֆիլմի՝ համացանցում ապօրինի ճանապարհով հայտնվելը օրենքի խախտում է, մասնավորապես՝ հեղինակային իրավունքի խախտում։ Հայաստանը ավելի քան 10 տարի առաջ միացել է գրական և գեղարվեստական ստեղծագործությունների մասին Բեռնի կոնվենցիային, ինչպես նաև հեղինակային իրավունքի ոլորտը կարգավորող միջազգային այլ ակտերի, օրինակ՝ Ժնևի կոնվենցիային, իսկ 2006-ից գործում է «Հեղինակային իրավունքի և հարակից իրավունքների մասին» ՀՀ օրենքը: Այնուամենայնիվ, յուրաքանչյուր քաղաքակիրթ հասարակության մեջ գլխավոր նպատակը պետք է լինի մարդու իրավունքների՝ այդ թվում հեղինակային իրավունքի պաշտպանությունը»,- եզրափակեց իրավաբանը։

Հասմիկ Բալեյան

 
Նմանատիպ նորություններ
Ձերբակալված Դավիթ Սանասարյանի հայտարարությունը
23 Ապրիլի 2018 - 00:07
Այսօր կեսգիշերին ձերբակալված Դավիթ Սանասարյանի կինը՝ Սոնա Հովհաննիսյանը, Ֆեյսբուքյան իր էջում տարածել է Սանասարյանի հայտարարությունը՝ ուղղված ՀՀ քաղաքացիներին։ Դրանում, մասնավորապես, ասված է.
Նիկոլ Փաշինյանը Սևանի ոստիկանության բաժնում է
22 Ապրիլի 2018 - 23:46
Նիկոլ Փաշինյանը գտնվում է Սևանի ոստիկանության բաժնում: Այս մասին տեղեկացվել է Փաշինյանի ֆեյսբուքյան էջում:
Ֆրանսիայի հրապարակում ոստիկանները բերման են ենթարկում ցուցարարներին (Տեսանյութ)
22 Ապրիլի 2018 - 23:37
Ոստիկանները Ֆրանսիայի հրապարակում բերման են ենթարկում ցուցարարներին: Այստեղ կուտակված են ոստիկանական ուժեր:
Ես անում եմ իմ քայլը, և միանում եմ իմ ժողովրդին. «Դատապարտյալների հիվանդանոց» ՔԿՀ վարչության պետ
22 Ապրիլի 2018 - 23:34
«Դատապարտյալների հիվանդանոց» քրեակատարողական հիմնարկի վարչության պետ Արման Աղաքարյանը ֆեյսբուքյան իր էջում հայտնել է, որ միանում է բողոքի ակցիայի մասնակիցներին:
Բողոքի ակցիա շերեփների հարվածով
22 Ապրիլի 2018 - 23:15
Այս պահին քաղաքի տարբեր հատվածներում ակցիա է. շերեփներով հարվածում են, այդ կերպ արտահայտում իրենց բողոքը:
Լևոն Բարսեղյանին մեղադրանք առաջադրվեց. նախաքննական մարմինը կալանավորելու միջնորդություն է ներկայացրել
22 Ապրիլի 2018 - 23:04
Գյումրիի լրագրողների «Ասպարեզ» ակումբի նախագահ Լևոն Բարսեղյանին քիչ առաջ մեղադրանք է առաջադրվել: Այս մասին News.am-ին ասաց նրա պաշտպան Արաքս Մելքոնյանը:
Հայրենիքիցս շատ հեռու եմ, բայց չեմ կարող անտարբեր մնալ երկրումս կատարվող իրադարձությունների նկատմամբ. Անի Երանյան
22 Ապրիլի 2018 - 22:58
Անի Երանյանը «Instagram»-ի իր էջում գրել է. «Ես ՀՀ քաղաքացի եմ և չեմ պատկանում որևէ կուսակցության։ Այս պահին գտնվում եմ հայրենիքիցս շատ հեռու, բայց չեմ կարող անտարբեր մնալ երկրումս կատարվող իրադարձությունների նկատմամբ։
1 | 2 | 3 | 4 | 5 | 6 | 7 | 8 | 10957
 
Լրահոս`