Սաակաշվիլին կրկին անդրադարձել է իր հայկական ծագման մասին խոսակցություններին (տեսանյութ)

«Եթե դուք ատում եք ադրբեջանցիներին` ես ադրբեջանցի եմ, եթե հայերին, ապա հայ եմ, եթե հրեաներին, ապա ես աշխարհի ամենամեծ հրեան եմ, բայց ամեն դեպքում, ես ամենամեծ վրացի հայրենասերն եմ»,- ասել է նա:

Որպես ասվածի օրինակ` նա հիշեցրել է, Դավիթ Շինարար թագավորին, ով բոլորին կրոնական ազատություն էր տվել, փոխանցում է Tert.am-ը:

«Նա մի օր այցելել է մզկիթ, հաջորդ օրը` սինագոգ, ապա այս եկեղեցին, այն եկեղեցին: Ես հաճախ եմ հիշում նրա մասին և բոլոր «հայրենասերները» խճճվում են, որովհետև դա իրոք այդպես էր»,- ասել է Սաակաշվիլին:

Նա նշել է, որ Վրաստանը հեռանկարային երկիր է, քանի որ լինելով փոքր երկիր, իրենք դարեր շարունակ բոլոր այդ մշակույթները միավորել են:
«Այստեղ կան բոլոր մշակույթների հետքերը և ես հպարտ եմ դրա համար: Ես դա զգում եմ իմ վրա: Իմ ընտանիքը սերում է Վրաստանի տարբեր կողմերից` արևմուտքից արևելք: Արևելքն ավելի խիստ է և համառ, իսկ արևմուտքն ավելի է հակված կոմպրոմիսների: Դրա համար իմ մեջ երկուսն էլ կա»,- ասել է Սաակաշվիլին` ավելացնելով, որ կյանքն այդպես ավելի հետաքրքիր է:

Հարցազրույցի ընթացքում Սաակաշվիլին անդրադարձել է նաև Ռուսաստանի նախագահ Վլադիմիր Պուտինի վերջին հայտարարությանը, թե Վրաստանի դեմ պատերազմը վաղուց էր պլանավորված: Սաակաշվիլին նշել է, որ դա ոչ մեկի համար էլ գաղտնիք չի եղել և Պուտինը, հավանաբար, այդ հայտարարությունն արել է ներքին լսարանում ուժեղ երևալու համար:


HayNews.am