Երաժշտությունը միավորել է հայ եւ ադրբեջանցի երաժիշտներին

Ինձ հաջողվեց զրուցել երաժիշտներից Միքայել եւ Աշոտ Ոսկանյանների հետ, ովքեր պատմեցին իրենց տպավորությունների մասին:

Երաժիշտները մեկն էլ էին Ալանդյան կղզիներ ադրբեջանցի, ալանդացի երաժիշտների հետ համատեղ համերգ տալու նպատակով:

Միքայելն ու Աշոտը նշեցին, որ մեկ շաբաթյա այցելությունը բավականին հագեցած է եղել. կազմակերպվել են քննարկումներ, դասընթացներ, կատարվել երաժշտական փորձի փոխանակում:

Միքայել Ոսկանյանը պատմեց, թե իրենք ի սկզբանե մտավախություն ունեին, որ ադրբեջանցիների հետ շփումը չի ստացվի, սակայն.

«Օգոստոսի 6-ին, մենք և ադրբեջանցի երաժիշտները հանպատրաստից համերգ ունեցանք` նվիրված Հիրոսիմայի զոհերի հիշատակին: Միասին նստեցինք, նվագեցինք եւ բոլոր մտավախությունները կարագի նման հալվեցին ու անցան»:

«Հասարակ մարդկանց հաստատ պատերազմ պետք չի,- նշում է երաժիշտ Աշոտ Ոսկանյանը,- լինում էր միասին նստում գարեջուր էինք խմում»:

Թեեւ օգոստոսի 10-ին Ալանդյան կղզիների մայրաքաղաք Մարիեհամնի հրապարակի բեմում հայ եւ ադրբեջանցի երաժիշտները պետք է համատեղ կատարմամբ հանդես գային, սակայն դա տեղի չի ունեցել, ադրբեջանցիներն ինչ-ինչ պատճառներով հրաժարվել են:

Համերգին համատեղ կատարումներով հանդես են եկել հայերն ու ալանդացիները եւ ադրբեջանցիներն ու ալանդացիները:

Հայ երաժիշտներն այնուամենայնիվ ուրախ են, որ համագործակցությունն ինչ-որ չափով ստացվել է:

Հայ և ադրբեջանցի երաժիշտների հարաբերությունները լարված չեն եղել Ալանդներում, ավելին նրանք անգամ նվերներով են փոխանակվել:

«Ադրբեջանցի երաժիշտները հայկական պատվիրակության յուրաքանչյուր անդամին շարֆեր նվիրեցին, հրավիրեցին ճաշի, մենք էլ նրանց կոնյակ հյուրասիրեցինք»,- ասաց Աշոտ Ոսկանյանը:

Երաժիշտները պատմեցին նաեւ , որ ադրբեջանցի երաժիշտներից մեկը 1985 թվականին եղել է Հայաստանում, իր երաժշտական գործիքի` թառի պատրաստող վարպետը հայ է եղել. «Նրանք անգամ հետաքրքվում էին, թե ինչ է փոխվել Երևանում,-պատմեց Միքայելը,- նրանց ճաշակից, հագուկապից հասկանալի էր, որ գրագետ խումբ էր եկել»:

Աշոտ Ոսկանյանը ցանկություն հայտնեց աշխատելու նաև ադրբեջանցի երաժիշտ Էմիլի հետ` գնահատելով նրա տաղանդն ասաց. «Նոր երաժշտի հետ աշխատանքը նոր բան է տալիս, նոր ճանապարհ է բացում»:

Ալանդներում երաժիշտները նաեւ համատեղ թատերական ներկայացում են տվել և երաժշտական համարներ կատարել: Ինչպես նշում են երաժիշտները, երաժշտական համարների մասին կարծիքները դրական են եղել, ներկաները զարմացել են հայ երաժիշտների կատարումների մաքրության վրա:

Հայ երաժիշտների խումբը, որը կազմվել էր «Խաղաղության ձայներ» նախագծին մասնակցելու համար, նախատեսում է շարունակել համագործակցությունը միմյանց հետ նաև հայրենիքում:

Նկարները` Միքայել Ոսկանյանի անձնական ալբոմից:

Mynews.am Արփինե Արզումանյան

HayNews.am