Facebook   Twitter
 
Կոռուպցիոն ռիսկերը նվազեցնելու ուղղությամբ աշխատանքն ակնհայտ է, բայց չի նշանակում, որ հասել ենք ցանկալի արդյունքի. ՃՈ պետը՝ ոլորտում առկա հարցերի ու փոփոխությունների մասին

Կոռուպցիոն ռիսկերը նվազեցնելու ուղղությամբ աշխատանքն ակնհայտ է, բայց չի նշանակում, որ հասել ենք ցանկալի արդյունքի. ՃՈ պետը՝ ոլորտում առկա հարցերի ու փոփոխությունների մասին

24 Դեկտեմբերի 2017 - 19:56
«Օտարերկրյա համարանիշերով» մեքենաների վարորդներին տուգանելու, մգեցված ապակիների դեմ պայքարի, ՃՈ-ում ծառայողների կողմից տեսանկարահանող սարքեր կրելու արդյունքի, ՃՈ ծառայողներին ուղղված մեղադրանքների և այլ հարցերի շուրջ Tert.m-ը զրուցել է ՀՀ ոստիկանության «Ճանապարհային ոստիկանություն» ծառայության պետ, ոստիկանության գնդապետ Եգոր Կարապետյանի հետ:
-Պարո՛ն Կարապետյան, այդ պահի դրությամբ առաջնահերթ ի՞նչ փոփոխություններ են նախատեսված Ճանապարհային ոստիկանությունում, կառուցվածքային փոփոխություններ նախատեսվա՞ծ են:

-Ներկա պահին Ճանապարհային ոստիկանությունում նոր կառուցվածքային փոփոխություններ նախատեսված չեն: Ընդհանրապես, կառուցվածքային փոփոխություններին ինքնանպատակ չեն և չեն կատարվում տարերայնորեն կամ հապճեպ որոշումների հիման վրա: Նման փոփոխությունները, նախ և առաջ, պայմանավորված են գործառութային փոփոխություններով, այսինքն՝ գործառույթների ավելացմամբ, պակասեցմամբ կամ ստորաբաժանումների գործառույթների վերաբախշմամբ, և կատարվում են վերլուծությունների ու հաշվարկների հիման վրա:

-Պարո՛ն Կարապետյան, որոշ ժամանակ առաջ հայտարարեցիք, որ օտարերկրյա հաշվառում ունեցող մեքենաների իրավախախտ վարորդները տուգանվելու են և տուգանքը վճարելու են սահմանին: Արդեն հստա՞կ է, թե երբվանից են տուգանվելու իրավախախտումների համար:

-Հայաստանի Հանրապետությունում չհաշվառված կամ, այսպես կոչված, «օտարերկրյա համարանիշերով» տրանսպորտային միջոցների իրավախախտ վարորդները միշտ էլ ենթարկվել են վարչական պատասխանատվության, ուղղակի՝ միայն Ճանապարհային ոստիկանության ծառայողների կողմից հայտնաբերվելու դեպքում: Ինչ վերաբերում է արագաչափ սարքերով կամ տեսախցիկներով հայտնաբերված իրավախախտումներին, ապա շուտով՝ մոտ մեկ շաբաթից, կգործի նաև այդ իրավախախտումների համար վարչական պատասխանատվություն կիրառելու համակարգը: Մասնավորապես. եթե այդ տրանսպորտային միջոցը Հայաստանի Հանրապետություն է ներմուծել Հայաստանի Հանրապետության քաղաքացին, ապա որոշումները կկայացվեն նրա նկատմամբ և կծանուցվեն նրա հասցեով, իսկ եթե տրանսպորտային միջոցը Հայաստանի Հանրապետություն է ներմուծել օտարերկրյա քաղաքացին, ապա որոշումները կկայացվեն նրա նկատմամբ և կծանուցվեն սահմանին:

-Կա հիվանդությունների ցանկ, որոնց առկայության դեպքում քաղաքացին չի կարող վարորդական իրավունքի վկայական ստանալ, որը տրվում է տասը տարի ժամկետով: Ինչպե՞ս են վերահսկվում այն դեպքերը, երբ, օրինակ, այդ տասը տարվա ընթացքում վարորդը ձեռք է բերում այդ արգելված հիվանդություններից որևէ մեկը, վերահսկման մեխանիզմ կա՞, թե՞ ոչ:

-Այն դեպքում, երբ անձի մոտ տրանսպորտային միջոց վարելու սահմանափակումներ առաջացնող պատճառը` հիվանդությունը կամ արատը ի հայտ են գալիս վարորդական վկայականն ստանալուց հետո, դրա նկատմամբ վերահսկողությունն առաջին հերթին իրականացվում է երթևեկության ընթացքում, երբ որևէ իրավաչափ պատճառով կանգնեցվում է տրանսպորտային միջոցը և ստուգվում են փաստաթղթերը: Եթե անձի մոտ առկա տրանսպորտային միջոց վարելու սահմանափակումներ առաջացնող պատճառը գրառված չէ վարորդական վկայականում, օրինակ՝ թույլատրվում է վարել ակնոցով կամ թույլատրվում է վարել ձեռքի կառավարմամբ տրանսպորտային միջոց, ապա Ճանապարհային ոստիկանության ծառայողը դադարեցնում է տրանսպորտային միջոցի շահագործումը:

Բացի դրանից՝ որոշ դեպքերում նման պատճառների մասին Ճանապարհային ոստիկանությունը տեղեկացվում է համապատասխան բժշկական կազմակերպությունների կամ պետական մարմինների կողմից, որից հետո միջոցներ են ձեռնարկվում այդ անձանց վարորդական վկայականները վերցնելու ուղղությամբ:

-Պարո՛ն Կարապետյան, Հատուկ քննչական ծառայության կողմից պարբերաբար հաղորդագրություններ են տարածվում, համաձայն որոնց՝ ՃՈ աշխատակիցներին մեղադրում են կաշառք վերցնելու մեջ: Դրանք դեռևս մեղադրանքներ են, սակայն ի՞նչ է արվում կոռուպցիոն ռիսկերը նվազեցնելու համար, օրինակ՝ որոշ երկրներում լուծման տարբերակներից մեկը աշխատավարձի բարձրացումն է:

Կոռուպցիոն ռիսկերը նվազեցնելու ուղղությամբ միջոցառումներ իրականացնելը միշտ հանդիսացել և հիմա հանդիսանում է պետական համակարգի կարևոր գործառույթներից մեկը: Կարծում եմ՝ բոլորի համար ակնհայտ է վերջին տարիներին այդ ուղղությամբ կատարված մեծածավալ աշխատանքը, սակայն դա ամենևին չի նշանակում, որ մենք հասել են ցանկալի արդյունքի կամ այլևս անելիք չունենք:

Ներկայումս, նաև անկախ փորձագետների ներգրավմամբ ընդհանուր պետության մակարդակով մշակվում է նոր միջոցառումների ծրագիր-ժամանակացույցի նախագիծ, որում իր տեղն ունի նաև ճանապարհային ոստիկանության գործունեության ոլորտը, և սահմանված կարգով հաստատվելուց հետո կշարունակվի այդ ուղղությամբ միջոցառումների իրականացումը:

- Մյուս տեսանկյունից, յուրաքանչյուր ահազանգ, սոցցանցերում յուրաքանչյուր հրապարակում վերածվում է մեղադրանքի, մի քանի փուլերով տարածվում է լրատվամիջոցներում՝ երբեմն խախտելով անմեղության կանխավարկածը: Լուծված համարո՞ւմ եք ՃՈ ծառայողի պաշտպանվածության հարցը, մի փոքր խոցելի չե՞ն:

-Ճիշտ է՝ յուրաքանչյուր հրապարակում վերածվում է մեղադրանքի, սակայն ցանկացած մեղադրանք, եթե չի ապացուցվում քրեադատավարական օրենսդրությամբ սահմանված ընթացակարգերով, չի դառնում դատավճիռ և որևէ մեկը չի դատապարտվում:

Ինչ վերաբերում է նախապես այդ մասին հրապարակելուն, ապա հաշվի առնելով, որ Ճանապարհային ոստիկանության ծառայողները հանրային ծառայություն են իրականացնում, բնականաբար նրանց նկատմամբ հետաքրքրությունն ավելի մեծ է, և լրատվամիջոցներն էլ առավել մեծ ուշադրությամբ են հետևում նման լուրերին ու ակտիվորեն տարածում դրանք: Այստեղ, չեմ կարծում, որ կա անմեղության կանխավարկածի խախտում, քանի որ հրապարակվում է միայն փաստացի կատարվածի մասին տեղեկատվություն:

Պարո՛ն Կարապետյան, ի՞նչ փոխեցն ՃՈ-ում ծառայողների կողմից տեսանկարահանող սարքեր կրելը:

- Ճանապարհային ոստիկանության ծառայողների համազգեստի վրա տեսախցիկներ կրելն առաջին հերթին նախատեսված է ծառայության նկատմամբ վերահսկողության համար, և այդ առումով ունենք բավականին դրական արդյունքներ: Բացի այդ, տեսախցիկներ կրելը նաև պաշտպանում է ոստիկաններին անհարկի մեղադրանքներից: Նվազել են ինչպես ոստիկանների կողմից կատարված կարգապահական խախտումներ թույլ տալու վերաբերյալ դիմումների քանակը, այնպես էլ՝ ոստիկաններին որոշ ոչ իրավաչափ գործողությունների կատարման մեջ մեղադրելու վերաբերյալ դիմումների քանակը: Այսինքն՝ եթե օրինակ նախկինում կային վարորդներ, ովքեր իրենց նկատմամբ իրավախախտման վերաբերյալ արձանագրություն կազմելուց վրդովված անհիմն դիմումներ էին ներկայացնում՝ մեղադրելով ոստիկաններին ոչ իրավաչափ վարքագիծ դրսևորելու մեջ, ենթադրենք ասում էին՝ «ինձանից փող ուզեց, չտվեցի, դրա համար ակտ գրեց», ապա հիմա նման դիմումներ կարելի է ասել՝ չկան:

Բնականաբար, դրական արդյունքներ ունենք նաև մյուս տեխնիկական միջոցների կիրառումից: Մասնավորապես, և՛ սթափության վիճակի զննության սարքերը, և՛ ապակիների լուսաթափանցելիության չափի ստուգման սարքերը էական ազդեցություն ունեցան նման իրավախախտումների հայտնաբերման, և դրանով իսկ՝ ապագայում նմանատիպ խախտումների նախականխման գործում:

– Բացի դրանից՝ ՃՈ-ն բավարարվա՞ծ է սթափության աստիճանը ստուգող սարքերով, իսկ մգեցված ապակիների դեպքում դիմացի հողմապակու մգեցված լինելու դեմ աշխատանքներ տարվո՞ւմ են, կարծես թե նման մեքենաները գերակշռում են և ինչո՞ւ միայն դիմապակին, դժվա՞ր են հրաժարվում մգեցված ապակիներից, թե՞ այս դեպքում նկատի են առնվում նաև պաշտոնյաները, ովքեր հաստատ դեմ կլինեն թափանցիկ ապակիներին:

-Համակարծիք չեմ, այն մտքի հետ, որ մգեցված հողմապակի ունեցող տրանսպորտային միջոցները գերակշռում են: Հակառակը`եթե նախկինում յուրաքանչյուր շաբաթ կանխարգելիչ միջոցառումների ժամանակ հայտնաբերվում էր 30-40 նմանատիպ տրանսպորտային միջոց, ապա այժմ կա՛մ ընդհանրապես չեն հայտնաբերվում, կա՛մ առավելագույնը 4-5 տրանսպորտային միջոց: Սա արդեն դարձել է մեր ամենօրյա աշխատանքի մի մասը, և ես վստահեցնում եմ, որ որևէ մեկը չի էլ փորձում, ընդգծելով իր պաշտոնը կամ որևէ այլ հանգամանք, խուսափել առջևի հողմապակու թաղանթապատման կամ լուսաթափանցելիության չափի խախտումը վերացնելուց:

Tert.m
 
Նմանատիպ նորություններ
Ավարտվել է Վանաձոր ՔԿՀ-ի բազմաթիվ պաշտոնատար անձանց առանձնապես խոշոր չափերով կաշառք տված անձի վերաբերյալ քրեական գործի նախաքննությունը
26 Ապրիլի 2018 - 12:13
ՀՀ ԱՆ Վանաձոր քրեակատարողական հիմնարկի պաշտոնատար անձանց կողմից կատարված կոռուպցիոն հանցագործությունների վերաբերյալ քննված քրեական գործով ձեռք բերված բավարար ապացույցներով հիմնավորվել է, որ կաշառք ստանալու և կաշառք տալու հանցավոր շղթայում ներգրավված է ևս մեկ` այսպես կոչված զոն նայող` Թամազ Ֆերոյանը, որը, 2015 թվականից պատիժ կրելով Վանաձոր ՔԿՀ-ում, ինչպես անձամբ, այնպես էլ նույն հիմնարկում պատիժ կրող Արկադի Պապյանի հետ պարբերաբար տարբեր չափերի կաշառք են տվել ՔԿՀ-ի բազմաթիվ պաշտոնատար անձանց:
Ապօրինի անտառահատումների գործով բացահայտվել են կաշառք ստանալու և մի շարք այլ հանցագործությունների նոր դրվագներ. պետությանը պատճառվել է ավելի քան 244 մլն ՀՀ դրամի վնաս
25 Ապրիլի 2018 - 15:12
ՀՀ հատուկ քննչական ծառայությունում քննվող` «Հայանտառ» ՊՈԱԿ-ի տարբեր անտառտնտեսություններում ծառերի ապօրինի հատման և պաշտոնատար անձանց կողմից թույլ տրված չարաշահումների դեպքերի վերաբերյալ քրեական գործի նախաքննության ընթացքում բացահայտվել են ՀՀ բնապահպանության նախարարության նախկին բնապահպանական պետական տեսչության պաշտոնյաների ու «Հայանտառ» ՊՈԱԿ-ի աշխատակիցների կողմից պաշտոնեական դիրքը չարաշահելու, կաշառք ստանալու, կաշառք տալու, երկու տասնյակ պաշտոնական փաստաթղթեր ոչնչացնելու, պաշտոնեական կեղծիք կատարելու և պաշտոնեական անփութության բազմաթիվ նոր դրվագներ, որոնց հետևանքով պետությանը պատճառվել է առանձնապես խոշոր չափերով` ավելի քան 244.000.000 ՀՀ դրամի վնաս:
«Սևան ազգային պարկ»-ում պաշտոնեական լիազորությունները չարաշահելու և պաշտոնեական կեղծիքի փաստերի առթիվ հարուցվել է քրեական գործ
25 Ապրիլի 2018 - 15:00
ՀՀ վերահսկիչ պալատից ստացված` ՀՀ բնապահպանության նախարարության «Սևան ազգային պարկ» պետական ոչ առևտրային կազմակերպությանը պետական բյուջեից հատկացված միջոցների օգտագործման, բյուջետային մուտքերի ապահովման և պետական սեփականության կառավարման նկատմամբ իրականացված վերահսկողության արդյունքների վերաբերյալ ընթացիկ հաշվետվությամբ արձանագրվել են պետական շահերի խախտման մի շարք փաստեր:
Ձերբակալվել է զինված ուժերի փոխգնդապետ. խոստացել է նախընտրելի վայր դասավորել զինվորներին
14 Ապրիլի 2018 - 14:45
ՀՀ քննչական կոմիտեի ԶՔԳՎ ՀԿԳ քննության վարչության վարույթում քննվող քրեական գործով ԱԱԾ-ի հետ համատեղ ձեռնարկված քննչական եւ օպերատիվ-հետախուզական միջոցառումների արդյունքում ձերբակալվել է ՀՀ ԶՈւ փոխգնդապետ՝ ՀՀ քրեական օրենսգրքի 178-րդ հոդվածի 3-րդ մասի 1-ին կետով նախատեսված հանցագործություն կատարելու կասկածանքով:
Կոռուպցիայի դեմ պայքարը չի կարող միակողմանի լինել․ սոցիոլոգ
09 Ապրիլի 2018 - 16:13
Սոցիոլոգ Ահարոն Ադիբեկյանը վստահ է՝ այն երկրներում, որտեղ ժողովրդավարության ու կառավարման համակարգի էֆեկտիվության մակարդակը ցածր է, կոռուպցիան խորը արմատներ է գցում։ HayNews.am-ի հետ զրույցում սոցիոլոգը նշեց՝ եթե պաշտոնյան իրեն լիազորված սահմաններից դուրս չի գալիս, ապա, միանշանակ, այն ոլորտը, որտեղ տվյալ պաշտոնյան աշխատում է, կոռուպցիոն ռիսկերը հնարավորինս քիչ են լինում։
Քաղաքացուց 16 800 դոլար են հափշտակել ՊՆ-ից բնակարան ստանալու պատրվակով
07 Ապրիլի 2018 - 22:00
Քաղաքացիները ներկայացել են որպես անշարժ գույքի գործակալ, Պաշտպանության նախարարությունում ծանոթ ունեցող անձ ու Երևանի քաղաքապետարանի աշխատակից քաղաքացուց հափշտակել է 16 800 ԱՄՆ դոլար:
Առանձնապես խոշոր չափերով կաշառք ստացած Քննչական կոմիտեի ՀԿԳ ավագ քննիչի վերաբերյալ քրեական գործով մեղադրանքներ են առաջադրվել 9 անձանց
30 Մարտի 2018 - 15:10
ՀՀ քննչական կոմիտեի հատկապես կարևոր գործերով ավագ քննիչի կողմից առանձնապես խոշոր չափերով կաշառք ստանալու և դրա դիմաց զորակոչիկներին պարտադիր զինվորական ծառայությունից ապօրինի ազատելու առերևույթ հանցագործության դեպքերի վերաբերյալ քննվող քրեական գործի շրջանակներում 9 անձ ներգրավվել է որպես մեղադրյալ:
«Վանաձոր»-ի բանտի պաշտոնյաները դատապարտյալից կաշառք են պահանջել. ովքեր են նրանք
28 Մարտի 2018 - 16:51
ՀՀ ԱՆ «Վանաձոր» քրեակատարողական հիմնարկի պաշտոնատար անձանց կողմից կատարված կոռուպցիոն հանցագործությունների, այդ թվում` առանձապես խոշոր չափերով կաշառք ստանալու, կաշառք տալու և դատապարտյալների օգտին ակնհայտ ապօրինի գործողություններ կատարելու վերաբերյալ քննված բազմադրվագ քրեական գործի նախաքննությամբ ձեռք բերված բավարար ապացույցներով հիմնավորվել է, որ այսպես կոչված «զոն նայող» Արկադի Պապյանը, 2014թ.-ից պատիժ կրելով «Վանաձոր» ՔԿՀ-ում, ինչպես անձամբ, այնպես էլ նույն հիմնարկում պատիժ կրող մեկ այլ դատապարտյալի հետ պարբերաբար տարբեր չափերի կաշառք է տվել ՔԿՀ-ի պաշտոնատար անձանց:
Մեղադրանք է առաջադրվել «Դիլիջան ազգային պարկի» «Հաղարծին տեղամասի» ներկայիս եւ նախկին ղեկավարներին
26 Մարտի 2018 - 19:42
ՀՀ քննչական կոմիտեի հատկապես կարեւոր գործերի քննության գլխավոր վարչությունում «Դիլիջան ազգային պարկ» ՊՈԱԿ-ի «Հաղարծին տեղամաս» մասնաճյուղի մի շարք պահաբաժիններում կատարված ապօրինի ծառահատումների դեպքի առթիվ քննվող քրեական գործով մեղադրանք է առաջադրվել «Դիլիջան ազգային պարկ» ՊՈԱԿ-ի «Հաղարծին տեղամաս» մասնաճյուղի ղեկավար Ա.Մանուչարյանին եւ նախկին ղեկավար Հ.Հովհաննիսյանին:
1 | 2 | 3 | 4 | 5 | 6 | 7
 
Լրահոս`
 
 
 
 
 
 
 
 
 
 
 
 
 
 
 
 
 
ՀՀ նախագահի ուղերձը
Հասարակություն, Քաղաքական