Ինձ՝ որպես ՀՀԿ ղեկավար, փախուստն անձնական պատասխանատվությունից անընդունելի է․ Սերժ Սարգսյան

ԱԺ ՀՀԿ խմբակցության ղեկավար Վահրամ Բաղդասարյանը հայտարարեց՝ ՀՀԿ և ՀՅԴ կողմից վարչապետի պաշտոնում առաջադրվում է 3-րդ նախագահ Սերժ Սարգսյանի թեկնածությունը:

Խորհրդարանի ընտրած թեկնածուին վարչապետ է նշանակելու հանրապետության նախագահը։ Նշանակվելուց հետո վարչապետն առաջադրելու է փոխվարչապետերին, նախարարների թեկնածուներին։

Նոր կառավարության ձևավորման հնարավոր ժամկետը մայիսի 1-10-ն է։

Այս պահին ելույթ է ունենում վարչապետի թեկնածու Սերժ Սարգսյանը։ Վերջինս նշեց՝ երկու կողմից շրջափակված, փաստացի պատերազմական իրավիճակում գտնվող երկրի դեպքում, երբ իշխող կուսակցության ղեկավարը փորձի ի դեմս ինչ-որ մեկի փաստացի իրականացնել վարչապետի գործառույցները, դա, ըստ էության, կլինի ոչ միայն թուլություն, փախուստ պատասխանատվությունից, այլև իշխանական ուղղահայացի վտանգում, չհիմնավորված իշխանական տարրերի ակամա ներմուծում՝ իր բոլոր հետևանքներով։

«Սա հատկապես վտանգավոր է համապետական մոբիլիզացիայի և բոլոր ռեսուրսները համախմբելու, վտանգի չեզոքացման հրամայականի դեպքում՝ մի բան, որից, ցավոք, մենք երաշխավորված չենք։ Ինձ՝ որպես ՀՀԿ ղեկավար, փախուստն անձնական պատասխանատվությունից անընդունելի է․ երբե՛ք չեմ արել ու չեմ պատրաստվում։ Առաջին հերթին հե՛նց այդ պատճառով է, որ այսօր կանգնած եմ այս ամբիոնին», - ասաց Սերժ Սարգսյանը։

Վերջինս շեշտեց՝ արտաքին քաղաքականության ոլորտում լուրջ արդյունքներ են գրանցվել, տնտեսական դրական ցուցանիշներ կան, դրական դինամիկա, ինչը վկայում է այն մասին, որ երկրի տնտեսությունը զարգացման նոր հեռանկարներ ունի։

Իր ելույթում ՀՀԿ առաջնորդն ասաց, որ լրջորեն կարևորվելու են ժողովրդագրական ցուցանիշները բարելավելուն միտված քայլերը, նոր սպառազինության ձեռքբերմանը, դրա արտադրմանը, հայ զինվորի, սպայի ոգին բարձր պահելը, երկրի անվտանգության հետ կապված բոլոր հարցերը։

Հասմիկ Բալեյան